W Nimskej statkujucy zwězk za pśirodošćit „NABU“ wózjawijo kužde lěto lisćinu „pśirody lěta“. Za tym až jo NABU 1971 prědny raz ptaška lěta wuzwólił, su w běgu casa dalšne pśirodošćitne organizacije na wuzwólenjach pśirody lěta sobu statkowali, w ramiku zjawnostnego źěła za pśirodošćitne zaměry.

Nominěruju se kužde lěto družyny zwěrjetow a rostlinow kaž teke žywjeńske rumy, na kótarychž wobgrozonosć a nuzny šćit dej se wósebny zajm chyliś. How comy se pśiwobrośiś źěloju teje wuzwóloneje zwěrizny lěta 2024. W pózdźejšem wudaśu dej slědowaś hyšći wuzběrk rosćiny togo lěta.

Źiwe zwěrje lěta: jež

Rowno tak ako kśěty a reše (Spitzmäuse) licy jež (erinaceus europaeus) k rědoju žrackow insektow. Ježe su žywe ako samotniki a su pśewažnje pó změrkanju a w nocy aktiwne. Jich jěźny plan jo wjeleraki, na njom stoje pódla insektow teke pawki, stonožki, wužeńce, sliniki, žaby abo myšy. Pśi tšachośe se zawijo jež a prezentěrujo swóje štapce. Dorosćone ježe maju 6.000 do 8.000 štapcow, rowno naroźone nejpjerwjej jano něźi 100 štapcow.