Z Grodka/Spremberg. Lěbda su gódy mimo byli, su se pódali grodkojske gwězdne spiwarje na swóju prědnu turu pó měsće – nagromadu 20 źiśi. Južo wót zachopjeńka nowembra su pśigótowali spiwanje na Tśoch kralow a su zwucowali z dłujkolětnyma muzikaliskima pśewóźowarjoma Anikó Peyerl-Fekete a Benjamin Rave. Prědny raz stej byłej Jenna Lachmann a jeje źowka Charlotte pódla, kótarejž grajotej na flejśe.

Akcija gwězdnych spiwarjow jo se derje wuwijała. Kužde góle smějo sobu gótowaś, lěc konfesiji pśisłuša abo nic. Toś to wuwiśe jo se mócnje pregowało pśez pedagogiske źěło w katolskej źiśowni „Bennolino“ w nosaŕstwje katolskich starjejšych. Źiśownja jo wótwórjona za wšykne źiśi a tak jo se wótwóriło gwězdne spiwanje w Grodku k zgromadnej wěcy za wšyknych. Ako su woglědali lodkow w nutśikownem měsće, su se wobsejźarje wjaselili wó žywych kopicach spiwarjow a su jich mytowali z pósćenjami w bogatej licbje za dobry zaměr a z małymi darami.