Spódobna gódowna atmosfera za familije, zmakanje a wuměna a – kaž pśecej, se wě – teke dobra zaběra su stojali w srjejźišću na alternatiwnem adwentskem marku, kenž jo se wótměł 9. decembra na Kloštaŕskem naměstnje w Chóśebuzu. Mjazy zarědowarjami jo wjelika licba chóśebuskich towaristwow a institucijow. Teke Serbski institut (SI) jo se – lětosa k stwórtemu razoju – ako sobuorganizator togo marka angažěrował. Pśi tom jo to był lětosa prědny raz, až jo kupka „rucne źěło na serbski“ ze swójskeju stojnicu wobźělona była. Katja Atanasowa a Joanna Szczepańska stej ze źiśimi wšake wěcki z papjery basliłej: žorawy, kašćiki a bomcyki. A pśepšosona wót Serbskego instituta jo lětosa awtorka Jill-Francis Ketlicojc na tom adwentskem marku ze serbsko-nimskim cytanim sobu statkowała. W bajkowej jurśe jo wóna źiśam gódowne tšojeńka a basni pśecytała, z techniskeju pódpěru Marcina Szczepańskego wót Serbskego instituta.