Ze Žylowa/Sielow. Wót pór lět jo se pód kšywom Wobydlaŕskego towaristwa Žylow z.t. etablěrowała kupka „Žylow za Žylow“. We njej źo wó wuměnu nejwšakorakšych zajmow, wó mjazsobny respekt a pśipóznaśe mjazy cłonkami wejsnych towaristwow a wobydlarjami bźez towaristwa. W nowembrje su we tej kupce źěłali na ideji, až wobydlarje w pśedgódownem casu pśed swójimi dwórami jadnotliwe gódowne stojnice insceněrujo a luźam móžnosć daju, na wjacorje pśed tśeśim adwentom w ramiku pśechójźowanja toś te stacije wobegnaś. „Ned za našom apelu jo nas pśechwatał wjelicki wótgłos luźi, ako su kśěli se wobźěliś. Naš cil jo był, 24 stacijow pórucyś, tak až móžomy kaž z adwentskim kalendarjom kuždy źeń we interneśe nowu staciju pśedstajiś. Ale naš kalendaŕ by mógł tek 45 źuŕkow měś“, groni Claudia Nowakowa (Noack), jadna tych iniciatorkow nowego póbitowanja, kótarež jo se južo w lěśu mějaŕ pensije „Nordstern“ Stephan Kossack wumyslił. Wjelicki zajm Žylowarjow jo jeju tu sobotu pówalił. Pśi kuždej staciji jo se pśinamakała wjelika mań luźi, a to nic jano dla piśa warjonego wina.