Z Města/Cottbus. Něźi 60 gósći jo pśichwatało stwórtk wjacor do Měsćańskeje a regionalneje biblioteki w Chóśebuzu na komorno-muzikowy kus pód motom: „Nježli až pójźoš – Bevor du gehst“. Z muziku Měrćina Weclicha, fotami Maćija Bulanka a tekstami Rože Domašcyneje. W srjejźišću stoje serbska drastwa a jeje nosaŕki, kótarež su raz słušali ku wšednemu dnju we cełej Łužycy. Jich naglěd jo se pómałem a sćicha z našogo žywjenja pózgubował. Awtorka Roža Domašcyna jo cytała na wjelgin gnujucy part ze swójich tekstow, kótarež su napisane we knigłach (z pśipołožoneju dvd) z Ludowego nakładnistwa Domowina pód samskim titelom. Wóna pišo wó wóznamje serbskeje drastwy z tym, až se pśiwobrośijo cuśniwje a lubosćiwje swójej mamje, kótaraž jo cas žywjenja gjarźe nosyła swóju drastwu.