Z Janšojc/Jänschwalde. Šula w Janšojcach w Picańskem amśe jo jadna wósebna, a to na wšaki part. Jo to šula w zelenem, wesrjejź góle, nic w centrumje teje wjelikeje jsy, ale w „pódzajtšu“. Śpy w tej šuli njamaju numery, ale za wětšy źěl mjenja serbskich powěsćow – lutk, plon a tak dalej. Kužda rědownja ma swóju stawnu rumnosć, njemusy pśeśěgnuś, ceła wucba jo w jadnej śpě.
Ale to nejwažnjejše a nejwěcej wósebne na tej šuli w Janšojcach- Pódzajtšu jo to, až jo wóna mimo Dolnoserbskego gymnaziuma ta jadnučka oficialna serbska šula w cełej Bramborskej! Za to njejo se jano wupytała to rědne mě „Krabat“, ale cełe wjelike twarjenje jo wupyšnjone a wugótowane pó serbsku – z toflami a napisami w serbskej rěcy, z wobrazami wót serbskich powěsćow a bajkow, pśi comž ga stoj ten luby „Krabat“ we srjejźišću.