Z Budyšyna/Bautzen. Wót Załožby za serbski lud insceněrowane idejowe wuběźowanje „Rěč zwjazuje. Rěc zwězujo. Sorbisch verbindet.“ jo mjaztym wjele zajma wubuźiło. Lětosa su mógali towaristwa, komuny, gmejny, institucije a druge swóje projektowe ideje wótedaś, kenž se pó originelnej wašni ze serbskeju rěcy a kulturu zaběraju, zwězany z regionom a do pśichoda pokažu. Mjazy 50 wótedanymi idejami z a zwenka Łužyce, jo musała jury 17 wuzwóliś. Toś te projekty su zajźony pětk wjacor w Serbskem domje w Budyšynje mytowali.

Ned dwa rěcnej projekta z Dolneje Łužyce stej dostałej nejžwuše myto, dotěrowane z 10.000 euro. To njejo žeden źiw, jo ga rěcna situacija how wósebnje prekerna. A rowno dla togo jo jury – 12 luźi z Dolneje, Górneje a srjejźneje Łužyce – wuzwóliła toś te pśedewześa, kenž stajiju wóžywjenje a dalejdawanje dolnoserbskeje rěcy do srjejźišća.