Ze Serbskego domu/Wendisches Haus. Klubownja w Serbskem domje w Měsće jo how nejwětša a zrownju teke nejrědnjejša rumnosć, teke ze swójimi wjelikimi běłymi sćěnami na tśich bokach. Te su pópšawem ceło běłe, ale tak móžomy je jano rědko wiźeś. Wob cełe lěto su ga wóni wjelgin pisane – wupyšnjone z wobrazami abo fotami, ako how wise we wósebnych wustajeńcach, kótarež wugótujo LODKA. Tenraz, a to hyšći do januara pśiducego lěta, su te tśi sćěny wósebnje pisane a z tym teke tak pšawje žywe. Jadnab 40 mólowanych wobrazow něnt how wisy – wětše a mjeńše –, a wšykne mólowane z wjelgin pisanymi barwami, tak ako je znajomy z natury.

Tak pisane a wšake su wóni tež wósebnje pśez to, až njejsu to mólby a wobraze jano jadneje mólaŕki abo jadnogo mólarja, ale až jo how wósym paršonow za tu wustajeńcu swóje wobraze zapódało. A to su wšykne k tomu hyšći žeńske, což ga jo něco kradu nowego a wósebnego w tej južo 123. wustajeńcy, ako LODKA z lěta 1992 tudy wugótowała jo.