Z Hochoze/Drachhausen. Nawal jo był wjeliki wót młoźiny z Dolneje Łužyce, ako jo młoźinski koordinator Tobias Unger na pśedslědnu zgromaźinu lětosa kazał. Hochoska młoźina jo swój młoźinski klub k dispoziciji stajiła. Tobias Unger jo wótwórił zgromaźinu a jo swójo stojnišćo k zarědowanju Superkokota w pozitiwnem a negatiwnem dał. Na jaden part jo to centralne połoženje Dešna, kótarež jo było wjelgin gódne a pódla dobrego wjedra jo se za wjele pśiglědowarjow póstarało. Teke mały pśeśěg pó jsy wót kjarcmy jo był rědny. „Dešno ma napšawdu pilnego šołtu, kótaryž glěda, až Dešno derje wuglědajo“, jo gronił Tobias Unger. Weto su teke kritiske dypki pśimali. Tak jo wuběźowanje z pśiglědowaŕskego wiźenja pśedłujko trało. Gaby se jano dwě góźinje rejtowało, by to dosegało. Pśemyslujo se, lěc dejali góźinu pózdźej zachopiś. A škóda, až njejo teke pó zabijanju kokota žeden zgromadny pśeśěg wšych pórow wót wrotow do sportaŕskego domu se organizěrował. Dalšny negatiwny aspekt jo był teke sektowa duša k wuznamjenjenju dobyśarja wjacor.