Wót 7. do 12. nowembra togo lěta móžomy w Chóśebuzu zasej kuždy źeń až do nocy filmy wiźeś, ako se howacej w kinach njegraju. Móžomy se wjaseliś na južo 33. Festiwal pódzajtšnoeuropskego filma, kótaryž jo na swój part jaden z nejwětšych a nejlěpšych filmowych festiwalow na cełem swěśe. Z něźi 600 do 800 filmow su Bernd Buder a Andreas Stein ako głownej organizatora togo festiwala a druge wupytali 150 filmow ze 40 europskich krajow ze pśedstajenje a pokazanje w Chóśebuzu. Su byli ducy na młogich filmowych festiwalach w Europje, aby se filmy woglědali, kótarež se góźe za chóśebuski festiwal. To se wě, až su teke w interneśe za takimi filmami pytali.

Něnto jo konkretny program za tych šesć dnjow zestajony. Tak ako kužde lěto se pokažu filmy w tśich głownych wuběźowanjach. W kategoriji „Grajne filmy“ pśedstajiju 12 filmow z Pólskeje, Georgiskeje, Českeje, Rumuńskeje, Hungorskeje, Finskeje, Estniskeje, Serbiskeje a dalšnych krajow. Su to wjelgin wšakorake filmy – tužne a wjasołe, historiske a ze źinsajšnego casa. Nejlěpšy film dostanjo Głowne myto wót 25.000 euro!