Z Města/Cottbus. Lětosa jo kokot na Dolnoserbskem gymnaziumje tšochu hynakšy był. DSG swěśi kužde lěto łapanje kokota a wukniki a wuknice 10. lětnika maju cesć to wugótowaś. 12 gólcow wójujo wó titel „kral“, za to muse wóni ako prědny ze zawězanymi wócymi glinjany gjarnc z cepami rozbiś a pón, gaž to jo se raźiło, za kokotom lětaś. Wjele luźi pak jo se w slědnych lětach wó „derjeměśe“ kokota starało. Cesto ma kokot wjele štresa. Dla togo jo se lětosa wjele diskusijow pśewjadło, lěc jo to hyšći nacasne, kokota góniś. Wuslědk diskusijow jo, až lětosa njedej kokot śerpjeś. Ale co gónje gólcy pón? Jo se rozsuźiło, až cłowjek dej kokota graś. Naš wuknikojski powědaŕ jo se zmilił a kokota grał z kostimom.