Z Janšojc/Jänschwalde. Domowinska kupka Janšojce jo na swójej kjarmušy dnja 28. oktobra w kjarcmje „Zur Linde“ wósebny kulturny wjerašk prezentěrowała: koncert z chorom Lipa (nimski Linde) z Pančic-Kukowa (Panschwitz-Kuckau). Na Rosi Tšukowej a Silva Oehlertojc jo było wiźeś pśi jeju serbskem a nimskem wuwitanju, až stej byłej kradu gnutej a gjardej, až toś ten wósebny chor we jeju jsy wustupujo. Kaž wónej, tak jo se to teke mjazy tymi we wjelikej licbje pśichwatanymi pśiglědarjami w janšojskej drastwje pokazało.
Južo pśi prědnych spiwach kaž „Ljubka Hanka“ jo to było za wšyknych pšawje pśegibujuce a su mócnje pśiklaskali. Te jasnučke głose tych 15 žeńskich a te mócne tych 14 mužow su se zjadnośili k pśerědnemu spiwanjeju.