Z Strjažowa/Striesow. Pśed 132 lět jo se prědny nimsko-serbski spiwaŕski swěźeń, a to 3. maja 1891, w Strjažowje wótměł. Toś ten swěźeń jo tencas Mato Rizo do žywjenja zwołał a z tym jo wón ten prědny za dalšne spiwaŕske swěźenje na jsach Dolneje Łužyce.

Sobotu, 21. oktobra, su Strjažowarje zasej na taki nimsko-serbski spiwaŕski swěźeń pśepšosyli. Strjažowaŕka Kerstin Böttcherowa jo wótwóriła swěźeń a jo gromaźe z Dešanaŕku Christinu Kliemoweju pó programje wjadła. Nejpjerwjej su źiśi ze źiśownje „Styri lětne case“ a źiśi z horta Brjazyna na rěźe byli. Južo tyźenje pśed tym su spiwy a małe reje nazwucowali.