Z Dešna/Dissen. Oficielne wótwórjenje Zorjow jo było pśed skóro dwěma mjasecoma. Wósym tyźenjow, w kótarychž te „Zorjaki“ a „Zorjacki“, ako te wobźělniki sebje samym gronje, su se intensiwnje zaběrali ze serbskeju rěcu. 12 kradu njejadnakich charakterow buźo hyšći wósym mjasecow gromaźe pśebywaś. Toś jo jasne, až na zachopjeńku jo stojało w srjejźišću, se mjazsobu zeznawaś a ako kupka gromadu rosć. Teke Zorjakam a Zorjackam jo wažne, až stej kupkowa dynamika a wuknjeńska atmosfera dobrej. Až se njegroni rěcnemu gnězdoju pódermo tak, to jo kradu zacuś, gaž stupijoš do togo Grabojskego domu. Te wobźělniki maju swóje pśedstajenja a deje se how derje, ga pśisamem ako doma cuś. Tak worduju pantochle nosone, kuždy ma w kupadle swój hantwal za ruki a w kuchni swóju nejlubšu tasku.