Jonas Šlodaŕ stoj w mustwje Brjazyna/Dešno we wrotach. Wón ma lušt, sobu jěś na EUROPEADU 2024.Hans Dabow jo doma w Barbuce a grajo sobu w mustwje „Eintracht Peitz“.

Z Drjenowa/Drehnow. W Drjenowje w Picańskem amśe maju rědne športnišćo, tšochu w „dolinje“, na dwěma bokoma wobdane a šćitane z wusokimi bomami. K tomu słušatej hyšći mjeńše športnišćo za trening a teke rědny športaŕski dom. Njeźelu, 1. oktobra, su se tam zmakali balokopaŕki z cełeje Łužyce. 18 jo jich to było – wósym z Górneje Łužyce, sedym z Dolneje Łužyce a tśi ze Slěpjańskich stron. Su to byli te, ako by kśěli se wobźěliś znowa pśi EUROPEAŹE a w zgromadnem treningu se na to pśigótowaś. „Łoni pśi EUROPEAŹE w Korytańskej (Kärnten) we Awstriskej bóžko žedne serbske žeńskece mustwo pódla njejo było, ale tenraz to na kuždy pad buźo“, jo k tomu groniła Simulic Paula z Barbuka (Bärenbrück). Wóna njejo jano dobra a nazgónita grajaŕka, ale se tež mócnje za pśigótowanje mustwa stara ako cłonk wósebnego wuběrka Domowiny.