Z Města/Cottbus. Njewšedny datum za 39. Schadowanku jo to był, ta sobota, 7. oktobra. Howacej jo se wótměła wóna w zachadnych lětach pśecej kóńc nowembra w kafeteriji Dolnoserbskego gymnaziuma. Załožba za serbski lud ako głowna organizatorka jo se wědobnje za drugi datum a městno rozsuźiła. Dokulaž šula jo w bydleńskem wobceŕku a wobydlarje su se w zajźonych lětach wobśěžkowali dla zogoloweje wobuze, jo se lětosa rozsuźiła za „Pisane dwórnišćo“. Toś to městno ma dalšny wužytk, źe jo wósebnje pśigótowane za wětše zarědowanja. Z tym jo było teke zastaranje rědowane. Až jo schadowanka tenraz se wótměła južo we oktobrje, jo měła toś tu pśicynu, až jo dejała zasej wordowaś zmakanje něgajšnych absolwentow, ale nic za tuchylnych wuknikow a wuknice Dolnoserbskego gymnaziuma. Jadnab 70 kórtkow jo se do togo pśedało a prědny raz jo dało kórtki online.