Ze Žylowa/Sielow. Z tradicionelnym łapanim kokota su se zachopili swětosnosći k 25. narodninam žylojskeje Witaj-źiśownje „Mato Rizo“. Pětk, 29. septembra, slědujo wjeliki swěźeński wjerašk z kjarmušu a drastwinym swěźenjom.

Nejpjerwjej, ga slědny tyźeń srjodu, jo stojało łapanje kokota na programje. Wótpowědnu kulisu jo wjele starjejšych a dalšnych cłonkow familijow dekorěrowało. Slědny raz jo se ten suknowy kokot pśiwónoźeł na južo starjonych wrotach, pśez kótarež su te „wódne muže“ – gólcy kupki 2 – na kołowych kónikach rejtowali. Louis, prědny startowaŕ, jo połny šyka głowu kokota pópadnuł. Za jogo konkurentowu Vincenta a Frida stej jano kśidle wušej wóstałej – tej stej wótryłej a druge a tśeśe městno zabrałej.