Z Rownego/Rohne. Zachadnu njeźelu su zasej hunderty woglědarjow zbliska a zdaloka na Njepilic dwór pśichwatali, aby gromaźe z pilnymi cłonkami Njepilic towaristwa, Rowniskimi a z gósćami z Pólskeje w spódobnej runźe swěśili, spiwali a bjatowali. Zachopił jo se swěźeń ze zajtšnym piwkom južo zeger jadnasćich a muzikaliski wótwóriła jo swěźeń pśi tom rowniska šalmajowa kapała.

Chtož jo hyšći zawcasa do Njepilic dwóra dojěł, jo mógł sebje hyšći wułojś kus znatego a woblubowanego Njepilic klěba, kenž se jano pjaco ku wósebnym góźbam. Chtož jo pśi tom z proznyma rukoma wostał, njejo ned zgłodnuł. Njepilic mustwo jo nanosyło to nejžlěpše, což slěpjańske strony maju póbitowaś: sam pjacony tykańc, prampany kal, kulkowe mlince a sušonu rybu, abo wuršt wót šlachtowanja w głažkach.