Ze Slěpego/Schleife. 50 lět Serbski folklorny ansambel Slěpe – kak kšasnje a rědnje su to 8. septembra w tamnem Serbskem kulturnem centrumje swěśili. Wušej 40 wót něntejšnych cłonkow ansambla jo pśisamem tśi góźiny publikum rozwjaseliło, jo, rozbuźiło ze spiwami, rejami, muziku a pisanymi ludowymi drastwami. Za publikum z wušej 200 pśiglědarjami jo to było napšawdu wjelike dožywjenje a kšasny wjacor. Ze znateju štucku „Daj mě jadno jajko“ jo se program zachopił a ze slěpjańskeju serbskeju hymnu „Slepe, to jo rjana wjeska“ jo se wón zakóńcył, a to jo ceły zal sobu spiwał.