Z Města/Cottbus. Do gmejny Kopańce/Neuhausen/Spree, w pódzajtšu wót Chóśebuza, słuša dogromady 15 wětšych a mjeńšych jsow, a to z dogromady něźi 5.000 wobydlarjami. A dokulaž jo było w slědnem stolěśu tam hyšći to serbske doma a źinsa tam hyšći zbytki wót togo su, běšo bramborske kulturne ministaŕstwo 2017 póstajiło, až słuša toś ta gmejna kompletnje do serbskego sedleńskego ruma. We dwěma jsoma – w Hažowje/Haasow a Wjelikich Dobrynjach/Groß Döbbern – běštej to wejsnej pśiraźe samej wobzamknułej, za tych dalšnych 13 jsow pak jo Serbska rada wótpowědnu pšosbu stajiła. Gmejnska rada ze zastupnikami ze wšych 15 jsow pak njejo była z tym wobjadna a jo zapódała ned skjaržbu pśeśiwo tomu. Tak ako w dalšnych źewjeś komunach we wokrejsoma Sprjewa-Nysa (SPN) a Damna-Błota (LDS).