Ze Slěpego/Schleife. Wušej tysac raz jo Serbski folklorny ansambel Slěpe w tych 50 lětach, ako wón južo wobstoj, wustupił – doma, we Łužycy, w Nimskej a w drugich krajach. Wšykne su byli rědne a wuspěšne za cłonkow ansambla a za publikum. Na jaden taki wustup pak budu se wěsće wšykne pśecej raźi dopomnjeś – ga na ten slědny pětk, źož su z pisanym galaprogramom swěśili w Serbskem kulturnem centrumje swóje 50. narodniny. Wušej 200 luźi ze Slěpego a tamneje wósady jo ten kšasny jubilejny swěźeń sobu dožywiło. Tśi góźiny dłujko – z małkeju pśestawku – su chor, muzikowa kupka a rejowańska kupka rozbuźony publikum rozwjaselili. Pśisamem 40 wót tych něntejšnych cłonkow ansambla jo „nonstop“ wustupiło z spiwami a rejami ze wobšyrnego repertoire ansambla, ako bu 1973 załožony. Wósebnje wjeraški su byli pśi tom te tśi „Slěpjańske swity“, to pisane pśedstajenje jatšownego casa a reje, muzika a spiwanja pód motom „Nalětne wjasela“.