Z Města/Cottbus. Bejnje dłujko jo to trało, ale něnto źo doprědka na dwěma wjelikima twaŕnišćoma w Chóśebuzu. Ako prědne to płaśi za tu „brachu“ wósrjejź města blisko Blechenoweje kupnice. Wjele lět dłujko jo ten wjeliki njerěšny flak luźi wjelgin rozgórił a kritiki su pśiběrali. Nowy wušy šołta Tobias Schick jo togodla zlubił, až co tak spěšnje ako móžno wšykno za to cyniś, aby se ta „bracha“ wótpórała.

Te prědne kšace se něnto za to gótuju. Slědny tyźeń su chopili wucysćiś wětšy źěl togo flaka, ako jo dogromady něźi 7.000 m² wjeliki. Tam deje pón rosć tšawa a druge rostliny, załožyś kśě grajnišćo za źiśi a ławki kśě stajiś. Pśedwiźone jo teke, až se ta sćažka wót Barlinskego naměsta až k Blechenowej kupnicy šyrša gótujo, togodla jo něnto teke dla twaŕskich źěłow zacynjona.