Z Dešna/Dissen. Južo pśed wěcej ako dwěma lětoma jo to grono było wót togo rěcnego projekta, kenž bazěrujo na metoźe imersije ako teke Witaj-projekt, ale „Zorja“ dejali se wobrośiś na dorosćonych. Załožarja togo projekta „Zorja“ stej Maksimilian Hasacki a Gregor Kliem z Dešna – a wobej stej wót źiśownje do Dolnoserbskego gymnaziuma Witaj a bilingualnu wucbu wótchójźiłej. Mjaztym jo se ale wjele stało a wósebnje Maksimilian Hasacki jo njewomucnje ducy był, jo projekt „Zorja“ na tšašnje wjele zarědowanjach pśedstajił, za to wabił, za pódpěrowarjami, docentami a „rěcnym gnězdom“, ako teke za spěchowanim wuwześnego rěcnego programa pytał. Mimo togo jo se wón intensiwnje zanurił do nowych metodow a technikow wuknjenja cuzych rěcow, jo se zaběrał z rěcnymi projektami drugich awtochtonych mjeńšynow. Což jo tam zgónił a nawuknuł jo wuproběrował w rěcnem kursu w Janšojcach.