Z Husa/Maust. Jo to była dešćowa reja na drugi part. Z machajucymi drastwowymi kóšulami su zachadnu njeźelu pśi njedobrem wjedrje wopytali, dešć wutšašyś. Domowinska kupka Janšojce jo na towaristwowy wulět do Husa pśepšosyła. Wjeliki źěl cłonkow jo z bórkojskeju Rumpeloweju gustu w Janšojcach wótjěł k Husańskemu młynoju. How jo južo band Kula Bula natwariła. Pjerwjej až su muzikarje z graśim zachopili, jo nawjedowaŕ chora Gerald Schön wuwitał gósći. Wón jo se wuźěkował Rosemariji Tšukowej za organizaciju a iniciatiwu. Janšojski muskecy chor „Frohsinn“ jo cynił zachopjeńk a jo pokazał źěl swójogo reportaira. Mjazy spiwarjami jo był teke lětosny žnjowny kral z Janšojc Linus Krokor. Pótom jo Janšojski žeńskecy chor wustupił a skóńcnje su spiwali gromaźe, ako chor. Se wě, až njejo směł tam spiw „Doma, doma rědnje jo“ felowaś.