Sedym rejtarjow jo nastupiło, aby žnjownego krala mjazsobu wuzgónili. Snaź se raźijo lětosa pśi superkokośe prědne městno zabraś.

Z Hochoze/Drachhausen. Zachadnu sobotu su Hochozarje nałog łapanja kokota swěśili. Wjelgin śopłego lěśojskego wjedra dla su nejžwěcej togo źěła na tejce měli, pśeto někotare luźe z wokoliny su pśišli, aby se 20 źowćow w burskich drastwach a sedymych rejtarjow woglědali. To su: Thomas Nattke, Lorenz Krauße, Tom Kuchling (prědny kral slědnego lěta), Kimi Ahrens, Bruno Wehlan, Louis Lehmann a Oskar Ruhl. Wšykne su se pśi cerkwi zmakali a pón z muzikaliskeju pódpěru Picańskich měsćańskich gercow k staremu športnišćoju wumaršěrowali respektiwnje wurejtowali. Tam jo Iben Lotric, kótaraž jo šefowka hochoskeje młoźiny, wšykne gósći nejžpjerwjej serbski a pótom hyšći raz nimski wuwitała. Pózdźej jo se Ronny Henke, chtož jo nowy šołta Hochoze, pla młoźiny za organizaciju, Manja Lobedowej za kónje, pla woblekaŕkow a drugich pomagarjow wuźěkował. Mimo togo su źiśam k wuspěšnemu łapanjeju kokota gratulěrowali, kótarež jo se dopołdnja wótměło.