Ze Žylowa/Sielow. Lětosny stupny stwórtk su se źurja k dwóroju něgajšneje postownje a pózdźejšeje pjakaŕnje w Žylowje wótwórili, dokulaž su źinsajšne wobsejźarje kólasowarjow dnja muskich na imbis skazali. Rustikalne sedła, typiske imbisowe zastaranje z piwom a grilowymi jěšnickami, ako teke rozwjaseleca muzika žylojskeje band „Vier gute Saiten“ su animěrowali wob ceły źeń wjele kólasowarjow ku pśestawce. Ceło na kšomje su dnjowne gósći něco zgónili wó planach, kótarež pótrjefiju tradiciski chrom na Žylojskej šoseji 92. Nad zachodom toś togo doma wisy nět toflicka „Stara Lodka“, kótaraž pokazujo na historiju doma.

Źinsajšny wobsejźaŕ Sven Bogacz jo gósći wó tom informěrował, až był chrom w 1920ych lětach bydleński dom a jo teke wobpśimjeł postownju. Pó pśewrośe jo how wótnožka chóśebuskeje pjakaŕnje Renner swój domicil měła. Pótom jo něgajšna loda wjele lět prozna wóstała, až do lěta 2019, ako jo cełkowny dwór nowego kupca namakał. Za njogo zewšym njejo se wótryśe starodawnego, cesći dostojnego doma k diskusiji stojało, a tak jo se jomu nowe žywjenje zadychnuło.