Z Bórkow/Burg. Bórkowy ma nowy serbski kralowy pórik: Sobotu wótpołdnja jo se kronowała. Dłujki cas pak jo tak wuglědało, až se njenamakajo nowy duo za toś ten symboliski amt. „Smej se wó tom pśemysliłej, ako smej cytałej inserat w amtskem łopjenje. W slědnem tyźenju w našej wjasołej familijowej runźe jo mója mama Sandra wulicowała, až raz jo teke była serbska kralowka. Ako jo pótom turistiska informacija telefoniski napšašowała, smej se rozsuźiłej nadawk pśewześ“, jo wulicował nowy serbski kral Anton Schenker na jawišću 29. Domowniskego a drastwinego swěźenja w Bórkowach.

22-lětny jo rowno skóńcył swójo wukubłanje ako zastojnstwownik, jo wótrosł w Bórkowach a rad jězdźi na motorskem kólasu. Jogo kralowka jo Romy Ortwaldojc z Wjerbna, kótaraž jo sobotu dostała swóju kronu wót prědownice Stefanie II. Romy pśiźo do 12. rědownje a grajo pla Wjerbańskich kopaŕskich źowćow. Wóna lubujo serbske tradicije a jo lětosa žnjowna kralowka na boce krala Etienne Grasso we Wjerbnje wordowała.