Z Noweje Niwy/Neu Zauche. Jadnorazna tradicija jo rejtowanje wó kołac w Nowej Niwje. Pśi toś tom žnjownem swěźenju kokot njegrajo žednu rolu, město togo wójuju młode gólcy we wuběgowanju na kónjach wó prědne městno, aby dostali sam pjacony kołac wót źowćow.
Zajźonu njeźelu jo było zasej tak daloko. W stawnem dešću su wokoło jadnogo mań Nowoniwjanarjow, gósći a samo kupka turistow z dalokego Wilhelmshavena narske cakali w gósćeńcu „Ku Górnym Błotam“, aby źowća a gólcy do zala kjarcmy za kupkowe foto gromadu pśišli. Krotko pó zeger 14:00 jo to skóńcnje tak daloko było, a swěźeński pśeśěg ze sedym rejtarjami, sedym dalšnymi gólcami a 14 źowćami pśewóźowane wót dujaŕskeje kapały „Spreewaldjungs“ jo se wudał do směra Zakrjowa, źož su gólcy a pilne pomocniki južo źeń do togo wuběganišćo ze 600 mejtarjami wótštapili.