Z Grodka/Spremberg. Dłujka tradicija maju mjaztym „Nocy muzejow we łužyskej muzejowej krajinje“ w septembrje a tradicionelnje pśepšosyjotej krajny raźc wokrejsa Sprewja-Nysa Harald Altekrüger a wjednica Dešańskego muzeja a powědaŕka toś teje źěłoweje kupki Babette Zenkerowa zastupniki medijow na „casnikaŕske snědanje“, aby jich wó pórucenjach a zarědowanjach pśisłušecych muzejow informěrowałej. To jo było tenraz zachadny stwórtk w Dolnołužyskem gólańskem muzeju w Grodku – pód gołym njebjom a ze serbskeju muziku wót Grodkojskich gólańskich gercow.

Lětosa, na 19. muzejowych nocach, se wobźělijo 31 muzejow, domowniskich śpow a drugich muzealnych institucijow ze swójimi programami pód motom „schowane pókłady“ na kóńcach tyźenja w septembrje. Zachopk ma sobotu, 2. septembra, Dešański muzej, kenž swěśi ned dwa jubileja: 40. lěto swójogo wobstaśa a 10 lět Stary lud. Ku tej góźbje pšosy Dešno na „drastiwal“, rozmjej drastwowy swěźeń, pśi muzice kupkowu Přezpólni a Drjewjanki, ale na tom dnju witajtej hyšći Domowniski muzej w Turjeju a wejsny muzej Zakrjow ze serbskima programoma.