Z Rogeńca/Branitz. Zachadny pětk wjacor jo se njezwucony wobraz pśed Rogeńskim grodom pokazał: technikarje su zukowu a swětłowu techniku natwarili, pód stanom su kelnarje piśe pśigótowali, gril zatopili a prědne woglědarje su na lěgańskich stołach slědne słyńcne tšny dnja póžywali. Góźba za to jo był jubilej w Chóśebuzu roźonego mólarja Korla Blechena (1798 – 1840), na kótaryž jo pšosyła Pücklerowa załožba (Stiftung Fürst-Pückler-Museum Park und Schloss Branitz), aby zgromadnje – pśewózone wót elektroniskeje muziki – do jogo 225. narodnego dnja, 29. julija, swěśili. Pśed tym su pak w informaciskem centrumje Pücklerowego parka ze swětosnymi słowami pśedsedaŕ Pückleroweje załožby, Stefan Körner, chóśebuski šołta Tobias Schick a direktor archiwa wót akademije wuměłstwow Barliń (Akademie der Künste), Werner Heegewaldt, wustajeńcu pód titelom „Künstler, Kollegen, Sammler: Carl Blechen und die Fricks“ wótwórili.