Wušej 40 lět som Casnik sobu pisał – na zachopjeńku ako šulski dopisowaŕ, pón jadno lěto ako praktikant a pózdźej ako jadnory redaktor a za tym dłujki cas až do wuměńka 2004 ako głowny, zagronity redaktor. To groni, až jo był Nowy Casnik (a hyšći jo) mójo žywjenje – rowno tak ako za móje něgajšne sobu-redaktorki a sobu-redaktorow, ako Wylem Bjero, Pawoł Šenkaŕ, Monika Słokowa, Adelheid Dawmowa, Hanelora Handrekojc a dalšne, ako su wóstali Casnikoju zwěrne, za wětšy źěl až do wuměńkaŕskego casa. Lěc móžomy wót źinsajšnych a pśiducnych casnikaŕkow a casnikarjow taku dłujku a kšutu zwěrnosć wótcakowaś, to njewěrim. Byś 52 lět redaktor pla serbskego Casnika, ako jo to gótował Kito Šwjela, to nejskerjej njebuźomej wěcej dožywiś! To pak płaśi teke za druge póla w serbskem žywjenju, źinsajšna młoda generacija ga njoco se tak zwězaś na dlejšy cas.