Južo jaden mjasec jo městno projektowego managera pśi towaristwje Serbski kulturny turizm wobsajźone. Młoda Janšowaŕka Šarlota Scüllerojc jo w Zgórjelcu management turizma študěrowała a póchada z gmejny Oybin w Žytawskich górach. Z njeju jo se redaktorka Nowego Casnika Konstanze Kušcyc rozgranjała.
Kake jo Wašo městno projektoweje managerki?
To jo městno, kótarež jo k połojcy w ramiku spěchowańskego programa „Serbska rěc a kultura w strukturnej změnje“ nastało. Mój nadawk jo how, nowe modelowe póbitowanja za serbski kulturny turizm, kótarež hyšći njedajo, twóriś. Cil jo, na Serbow ako jadnorazny wuznam (Alleinstellungsmerkmal) we Łužycy pokazaś. K tomu słuša teke kwalificěrowanje kulturneje, rěcneje, tematiskeje kólasowaŕskeje ruty „Serbske impresije/Sorbische Impressionen“. Na drugej połojcy źěłam za towaristwo a se staram wó nadawki, ako na pśikład wobstaranje cłonkow a dobyśe nowych cłonkow, informěrujom wó serbskem sedleńskem rumje a wobstaram internetowy bok.