Ze Žandowa/Sandow. Dešćowate wjedro njejo wótchyliło lazowarjow Žandojskeje biblioteki pśiś 15. junija na tśeśe literarne wótpołdnjo pósłuchat wótrězki z nimskeje literatury z Chóśebuza. „Zajm za take wótpołdnja jo był wjeliki, toś smy organizěrowali tśeśe wótpołdnjo z literaturu“, jo groniła pśedsedaŕka towaristwa Žandojskeje biblioteki Elke Dreko. Tenraz jo se Žandojska biblioteka rozsuźiła za wótpołdnjo, kótarež jo se drje wótměło w Žandowje, ale ducy w parku pód gołym njebjom. 30 narskich pśisłucharjow jo pśišło na to zmakanje Žandojskeje biblioteki. Prědna stacija jo był chóśebuski planetarium, kótaryž jo se załožył 26. junija 1974. W casu załoženja ako wjelgin droga inwesticija wót 2 milionow markow jo był pšawa sensacija ako drugi w Europje a sedymy na swěśe. Dalšne stacije su byli wšake pomniki (Ludwig Leichhardt), ale teke šćitane městna pód stolětnymi bomami, źož jo bomowa krona pśisłucharjow pśed dešćom šćitała. Pśedcytali su se wšake literariske twóŕby z Łužyce a Chóśebuza póchadajucych spisowaśelow.