Z Města/Chóśebuz. Jadnab 80 źiśi a teke dorosćone su se slědny stwórtk w zalu Piccolo-źiwadła bejnje źiwali, ako su cakali na zachopk pupkowego a senjowego graśa „Narske bajki“ Nimsko-Serbskego ludowego źiwadła. Na jawišću su natwarili zajmny metalowy konstrukt, ze wšakimi kólasami a kokotom na kšywje, kenž jo se pógibował a klapał. Se wě, až jo to był młyn, dokulaž wustupiła jo pón młynikaŕka Mina (Annekatrin Weberowa). Ako młyn felujuceje wódy dla njejo wěcej klapał, jo město togo Mina plapała kaž młyn. Wulicowała jo wóna tšojeńko wó pilnem źowću Anka a gniłem źowću Marja. Anka jo pśijazna a pomocniwa. Za lětom we słužbje pla bura Krawca se wrośijo domoj, ga z wózykom połnym darow. Ducy k buroju jo wóna wšakim pomogała: rampje, kónjoju, jabłušcynje, pałkaŕnicam a se wě, jo pilnje na burskem dwórje źěłała. Zawisna a zekśěta pśirodna mama pósćelo swóju gramotnu źowku Marju teke k buroju. Pśi njej jo to pak hynac ako pla Anki. Wóna ga teke pśinjaso to domoj, což jo sebje zasłužyła: škrodawy a žabki.