Z Bórkow/Burg. Naše Bórkowy su južo pla młogich luźi w cełej Nimskej a młogich drugich krajach znate pśez swóju wjelgin rědnu błośańsku krajnu. Něnt pak su hyšći wěcej znate – bóžko nic pśez bajkojte powěsći. Nejpózdźej wót slědnego stwórtka wěźe, až jo se tam něco njerědnego stało. W telewizijnem programje „Kontraste“ w ARD ga su w cełej Nimskej wiźeli a zgónili, až su w tamnej šuli „Mina Witkojc“ žedne wukniki pšawicaŕski wustupili z neonacistiskimi parolami a symbolami. A we filmje su to rozšyrili z tym, až su pokazali, až nic jano w Bórkowach take njerědne myslenja a cynjenje maju, ale teke w młogich dalšnych šulach – ako na pśikład w Grodku a dalej w cełej Dolnej Łužycy.