Z Rownego/Rohne. Slědnu sobotu su na „Serbske burske blido“ na Njepilic dwór pśepšosyli. Lětnje zarědowanje jo spěchowańske towaristwo „Njepilic dwór.“ južo wót zachopjeńka ako jadno z prědnych w kalendarju zarědowanjow wustajiło. Pśi tom su starše wobydlarje z Rownego a wokolnych jsow wó swójich něgajšnych dopomnjeśach wulicowali. To wšo jo se zapisało a archiwěrowało. Rudi Krawc jo to wšykno filmował a fotografěrował. A nastaty fundus jo pśisamem njewucerabny. Wětšyna tych, kótarež su tencas hyšći wobstojecu wědu pósrědnjali, njejsu južo dawno wěcej mjazy nami. Teke Rudi Krawc nic.

„Serbske burske blido“, organizěrowane wót Domowinskeje kupki Rowne a towaristwa Njepilic dwór, se wótměwa kužde lěto w měrcu ze wšakimi temami. „Tenraz smy kśěli aktiwne byś“ smy zgónili wót Manfreda Nikela, pśedsedarja spěchowańskego towaristwa. „Togodla smy stajili Serbske burske blido pód moto ‚Spiwajmy gromadu‘, se wě, naše stare slěpjańske ludowe arije. Dla togo smy towaristwo „Kólesko“ pśepšosyli, teke Gerald Šejn jo pśišeł. To jo wšyknych rozwjaseliło“.