Z Radowize/Radewiese. Wobydlarje „kralojstwa“ – ako wóni groni k swójej małej jsy – su w měrcu teke serbskej zymskej nałoga swěśili. Sobotu, 11. měrca, su camprowali, aby wšykno za zapustowy swěźeń zběrali; to groni ako pśecej pjenjeze, jaja, górki a tuk. Za to jo se wěcej ako 30 camprakow ceło pyšne kostimy woblekało a su ako starka a starki, zwěrjeta a ako dalšne kreatiwne póstawy pó jsy camprowali. W Radowizy jo tradicija, až młode a stare wobydlarje pśecej zgromadnje campruju a zapustuju, tak ako jo to howacej pla jubilejow, pótakem pla wjelikich zapustow. Slědnu sobotu, 18. měrca, jo zapust był. Wěcej ako 50 wobźělnikow z Radowize a Janšojc, wót kótarychž su wěcej ako źaseś źiśi byli, su se za kupkowe foto a wumaršěrowanje zmakali. Pó tom jo pśeśěg zachopił, pśi comž su měli dwě staciji, jadnu pśi Krokorojc. Dokulaž Radowiza njama wěcej žedneje kjarcmy, swěśe južo dłujke lěta w Janšojcach. Togodla su wótpołdnja pěšy tam maršěrowali. W susednej jsy su krotko pla Rosi Tšukoweje zastali, wóna jo pśedsedaŕka janšojskeje Domowinskeje kupki.