Z Pódstupima/Potsdam. Slědnu wałtoru jo se wótměło w Pódstupimje 24. pósejźenje Rady za nastupnosći Serbow (RASW). Tobias Dünow, statny sekretaŕ Ministaŕstwa za wědomnosć, slěźenje a kulturu (MWFK), jo k wěsći dał, až wót lěta 2023 / 24 buźo realizěrowany studij za wucbu na zakładnej šuli w pśedmjatoma nimšćina a matematika na BTU Chóśebuz-Zły Komorow. Dalej běže pśigótowanje, aby wót 2024 / 25 teke wukubłanje w šulskem amśe za zakładnu šulu za pśedmjat serbšćinu pśewjadli.

Ako gósć jo se na toś tom pósejźenju tenraz Ramona Oppermannowa wobźěliła. Wóna jo jadnaŕka firmy „Wuběrna ryba (Edelfisch) tzwr“ w Picnju. Wóna jo rozjasniła pśibytnym problematiku w rolnikaŕstwje. Ze slědkwjeźenim milinaŕnje Janšojce njedajo wěcej zastaranje z śopłeju wódu. Wóno pak jo trjebne za kubłanje małkich rybow, kótarychž šćitaju pśed žranim. Mjazy drugim zastarajo picańska „Wuběrna ryba tzwr“ teke błośańskich rybarjow z małkimi rybami. Něźi 80 procentow zasajźonych rybow łoje ptaški abo luźe ilegalnje. Za to njedostanjo picańska Wuběrna ryba žedne zarownanja.