Jadno lěto jo něnto Tobias Unger z Hochoze zagronity za młoźinske źěło w Domowinskej župje Dolna Łužyca. To jo župne pśedsedaŕstwo pógnuło, až móžo pśed tym gremiumom slědk glědaś na swójo doněntejšne źěło a až mógu teke cłonki pśedsedaŕstwa se k tomu wugroniś, kak wóni to wiźe. To jo był teke głowny dypk na prědnem lětosnem wobradowanju župnego pśedsedaŕstwa slědny tyźeń wałtoru w Serbskem domje.

Bejny źěl tych wušej 2400 cłonkow w župje Dolna Łužyca słuša hyšći do młoźiny. Mimo tych źewjeś młoźinskich kupkow Domowiny ga źěłaju w młogich towaristwach teke młode luźe pilnje sobu. Wušej togo se Domowina procujo, do swójogo źěła wósebnje we jsach teke zapśěgnuś młodu generaciju, a to wósebnje pón, gaž źo wó pśigótowanje a pśewjeźenje zapusta, kokota a dalšnych tradicijow a nałogow. A nic naslědku ma dolnołužyska župa teke wjele cyniś z tym, kak se młode luźe w šporśe angažěruju – wósebnje w mustwje „Serbske koparje/ Wendische Auswahl“ a pśi turněrach w balokopanju a volleyballu, ako župa južo wjele lět organizěrujo.