Z Popojc/Papitz. Na połdnjo su se zapustowarje pśi zgromadnem wejsańskem domje zmakali, aby zgromadnje pó jsy śěgnuli a zymu wugónili. Pjerwjej ako jo to se zachopiło, su se dali žeńske drastwu woblac a włose wusoko zatkaś. Muske su do swójich woblakow zalězli a su krawaty wězali. Pśi woblekanju swěźeńskeje drastwy su woblekaŕki pomagali. Jadna z nich jo była Monika Märkerowa z Brjazyny, wóna jo pomogała Silviji Kisselowej, kótaraž jo se teke wobźěliła na zapusće. „Ja som była zagronita za pśepase. To jo pla nas pšawy stacijowy běg, šesć žeńskich jo se musało woblac. Frizerka jo teke hyšći how była. Někotare su južo woblakli kóšulu, su trjebali pótom jano hyšći rubiško pśipóraś, šorcu a pśepas pśewězaś. „Gaž su prědne stacije pśi chopijucem sněgowanju zmejstrowali, su copali do zgromadnego wejsańskego doma na kafejowu pawzu. Dogromady jo něźi 40 pórow pśi pśeśěgu sobu gnało. 15 pórow z nich jo słušało k młoźinje. Młoźinska šefowka Jasmin Lukasojc jo groniła, „Pśemys-lujomy lěc znowa zasej cysty młoźinski zapust swěśimy, gaž dajo zasej dobre wobźělenje.“