Z Bórkow/Burg. Pó dwěma lětoma pandemije su Bórkowarje swěśili zasej zapust. A to jo był ten jubilejny 130. Tej wobej wobstojnosći stej wěcej luźi pśiśěgnułej ako w zachadnych lětach. Su zachopili pětk wjacor, 20. januara, z wustupom kupki „nAund Liveband“ a su swěśili „Warm-up-Party“. A sobotu zeger 14:00 su śěgnuli pó jsy. Jo se sněžyło a ned tajało. Tola to wjedro njejo zadorało, snaź jo napórało tu wósebnu zymsku atmosferu, kótaraž jo nam gódy a pśi progu nowego lěta felowała. Buse a awta su zastali w nasuwance, ale nichten njejo se górjeł dla togo. Kněz zapust jo wobguslował starobytnu błośańsku wjas z jeje wobydlarjami a gósćimi. Dogromady jo wěcej ako 300 wósobow šło swěśit. Wšykne su byli pógnute a su wuglědali glucne. Dujarje su wobstarali wjelicne muzikowe pśewóźowanje. Zapustowarje we wšakich starstwach su pód pśedešćnikami gnali wót swěźenišća pó jsy a su zeger 16:00 pśišli do wogrěwanego swěźeńskego stana. Tam su wšake piśa a caroby stojali na wuběrk, šnycele z kulkami su te nejwoblubowanejše byli. Něźi zeger 17:00 su pśi šlagrach chopili rejowaś.