Z Města/Cottbus. Na kaki part wy bjatujośo? Miliardy luźi pytaju trošt a pódpěru w bjatowanjach. Młoge se we wěstych situacijach Bogoju pśiwobrośiju, drugich pśewóźuju bjatowanja pśez wšedny źeń. Na pśikład:

Pójź naš Jezus, buź naš gósć a žognuj, což sy nam wobraźił.

Bjatowaś – se pśiwobrośiś Bogoju, to móžo luź ze swójskimi słowami, abo z takimi, kótarež su jomu dalej dawali w krejzu familije abo wucyli duchowne ceptarje. Chirurg bjatujo, aby se komplikowana operacija raźiła a starjejšej, aby se jeju gólc pó śěžkej wobchadowej njegluce wustrowił. Stara žeńska pšosy Boga wó šćit pśed njewjedrom a njedaru. Luźe bjatuju pśed pśespytowanim, pśed wažnymi rozsuźenjami, za raźenje prědkweześow, za swójske strowje abo derjeměśe familije, za měr na swěśe.

Lube cytaŕki a cytarje, na kaki part, z kótarymi słowami sćo Wy bjatowali ako źiśi, a kak to gótujośo źinsa? Jo to jadnory tekst abo rym, w nimskej, serbskej abo drugej rěcy?