Z Janšojc/Jänschwalde. Skóńcnje jo zasej tak daloko: lipšćańska uniwersita, Institut za Sorabistiku, pśewjeźo wót zymskego semestra 2022 bachelorski a masterski studij za zajmcow z Dolneje Łužyce. Jo to dalej- resp. dokubłanje a su to dogromady styri žeńske, ako su se na tu drogu pódali. Dwě wót nich studěrujotej na bachelor (tśi lěta) a dwě na master (dwě lěśe) we směrje wuceński amt. Jich pśedmjaty su fachowa didaktika, kulturne stawizny, literatura a dolnoserbska rěc. Wšykne styri južo źěłaju ako ceptaŕki, dwě na zakładnej šuli ako wótnabocnicy a dwě na wušej šuli. Jadna z nich jo pólskego póchada. Jich tyźeński góźinski plan jo něnto bejnje połny, deje ga pódla regularnego źěła ako ceptaŕki z jano styri góźinami mjenjej w šuli wše te pśedmjaty studěrowaś, a to w Lipsku a Chóśebuzu. Bóžko Statny šulski amt wěcej lichych góźin za ten studij njedowólijo. (Mógu se derje do studentkow zamysliś, som ga pśed 20 lětami na uniwersiśe w Pódstupimje pódobne dalejkubłanje organizěrowała.)