Ze Žylowa/Sielow. Južo 30 lět dłujko wobstoj wejsne źiwadło w Rownem w Domowinskej župje „Jakub Lorenc–Zalěski“. We tom dłujkem casu jo wóno rozwjaseliło ze swójimi za wětšy źěl luštnymi graśami w serbskej a nimskej rěcy južo wjele towzynt luźi. Slědnu sobotu wjacor su měli wósebnu premjeru. Docełego prědny raz ga jo wóno wustupiło w Dolnej Łužycy. Pśepšosyła běšo lajskich komediantow Domowinska kupka Chóśebuz, a to na tradicionalnu Serbsku kjarmušu, na kótarejž se měsćańske Domowinske cłonki gromaźe z kupku w Žylowje pó dobrej tradiciji južo wjele lět pśecej w nowembrje w gósćeńcu „Nordstern“ w Žylowje zmakaju.

Z Rownego běchu pśijěli do Žylowa tśo cłonki tamnego źiwadła – Edith Pjeńkowa, jeje syn Kito a Andrea Krupperowa. Dogromady ma źiwadło šesć cłonkow.