Z Budyšyna/Bautzen. „Wšo je krajina – Alles ist Landschaft – Wšykno jo krajina – Wszystko jest pejaźem“ groni se nowej wósebnej wustajeńcy, kótaraž pokažo twóŕby Jana Buka pśi góźbje jogo lětosnego, ga 100., narodnego dnja. Wóna jo se 2. oktobra w budyšyńskem Serbskem muzeumje swěźeński wótwóriła. Titel wótbłyšćujo „konsekwentne wugótowanje pokazowanja w styrich rěcach, we wobyma serbskima, we nimskej a w pólskej rěcy“, ako jo pódšmarnuła direktorka doma Christina Boguszowa.
Take póstupowanje „wótpowědujo rozměśu nejwuznamnjejšego twórjecego serbskego wuměłca pśibytnosći, kótaryž jo wiźeł Łužycu ako jadnotu, kótaryž jo statkował w cełej pódzajtšnej Nimskej a jo swójo wuměłstwowe statkowanje zachopił we Wrocławje.“