Z Ljubljany/Ljubljana. Pětk wjacor, dnja 26.8.2022, běšo swětocne wótwórjenje wustajeńce „Prevzetnost in pristranost narodne noše“ (Ante Trstenjak, Ludvík Kuba, Tina Dobrajc, Eric Schütt a Trine Søndergaard) w Mariboru, drugem nejwětšem měsće Słowjeńskeje a głowne město „słowjeńskeje Štajerskeje“. Wuznam togo tšojenja wiźi se juž z togo, až jo wustajeńcu wótwóriła samo ministaŕka za kulturu Słowjeńskeje, dr. Asta Vrečko. Nagrono jo teke měł šołta Maribora, Saša Arsenovič. Mjazy drugimi stej na wernisažy powědałej kuratorka a wuměłcowka Andreja Borin a Eric Schütt, kenž jo był za zdaśim jadnučki zastupnik z Nimskeje, źož jo se głowny źěł twóŕbow teje wustajeńce prědny raz pokazał w budyšyńskem Serbskem muzeju pód titulom „Barwy daliny“ nazymu 2020, (Nowy Casnik jo wó tom pisał). Tak njejo žeden zastupnik Serbow pódla był. Teke zachopny nosaŕ ideje a pógónjowaŕ cełego projekta, słowjeński pśijaśel Serbow Igor Pirc njejo pśišeł.