Z Budyšyna/Bautzen. Na dwórje Serbskego ludowego ansambla (SLA) se pilnje źěła. Skóro budu gótowe, a dwór teje institucije buźo kradu naglědny. Dnja 9. oktobera budu ten dom zjawnje wótwóriś. W źěłaŕni mě wita serbski 42lětny Tomas Kreibich-Nawka. Jogo jo rada Załožby za serbski lud zachopjeńk junija 2021 oficialnje ako intendant ta pówołała, pó wótchadu Judit Kubicec. Na jogo pisańskem bliźe laže wšake akty, wšak ma Kreibich-Nawka wót zachopjeńka radnu kopicu źěła wugbaś. Wón wulicujo: „Mam mimo mójogo nadawka, ansambel wuměłski nawjedowaś, zgromadnje z jadnaŕku Dianu Wagnerec teke na to źiwaś, aby nowotwaŕ a pśetwaŕ tak běžyłej, až změjomy dobre wuměnjenja za nazwucowanje našych programow, za našo wuměłstwowe źěło. K 70. lětnemu wobstaśu SLA comy w oktobru na jubilejnem kóńcu tyźenja naš galaprogram prezentěrowaś.“ Nowy intendant se pali za swóju nowu funkciju. „Njejsom musał ju pśiwześ. Som to kśěł, dokulaž njasom rad zagronitosć, a SLA lažy mě na wutšobje. Ansambel schowa telik potenciala, ale jo trjeba, jen pśestrukturěrowaś.