Ze Złego Komorowa/Senftenberg. Kšuty termin w kalendarje Serbskeje wósady jo kužde lěto w awgusće serbsko-nimska namša we złykomorojskej Serbskej cerkwi. 39 namšarjow zbliska a zdaloka – mjazy nimi teke wótere namšaŕki w serbskej drastwje – jo pśichwatało 14. awgusta na 13. dwójorěcnu namšu nowšego casa w tej cerkwi, kótaraž zbytk lěta słužy ako bergaŕski dom. K drugemu razoju jo se swěśiła lětosna Bóža słužba ako ekumeniska, rozměj na mšy stej pśepšosyłej gromaźe ewangelska a katolska wósada we Złem Komorowje. Liturgiske nawjedowanje stej měłej ewangelski faraŕ Manfred Schwarz a faraŕ Udo Jäkel wót katolskeje wósady swětego Pětša a Pawoła. Na wupokazanu wašnju su sobu statkowali dr. Madlena Norbergowa z cytanim, kantor Wilfried Wilke na piano a Ginter Pawliš pśi organizaciji.