Z Chóśebuza/Cottbus. Pód górucym słyńcom jo se pśedslědnu sobotu we Puškinowem parku wuswěśił 29. serbski swěźeń w ramiku měsćańskego swěźenja w Chóśebuzu. Korony dla jo zarědowanje dwa raza wupadnuło, dla togo su kśěli organizatory publikumoju něco wósebnego póbitowaś, a su gromadu stajali wjeleraki pyšny program z rejami a muziku – to groni, wót młodeje serbskeje popoweje muziki a ludowych spiwow do starosłowjańskich zukow. Wšake serbske towaristwa, rucnikarje a institucije su woglědarjow wó serbskej rěcy a kulturje informěrowali. Zachopił jo ten źeń dopołdnju ze zajtšnym piwkom, kótarež jo dujaŕska kapała Horjany wobrubiła a jo z tym ned cłonkow drastwineje kupki z Noweje Niwy k rejam do jawišća wabiła.