Z Turjeja/Tauer. Wót prědnego maja jo kuždy, ako jo pśez wjas jěł, wiźeł 18 mejtari wusoki majski bom najsy, pśi domje wognjoweje wobory. Pśigótowanja za to su južo zachopili tśi dny pjerwjej, ako su se młodostne wejsańskeje młoźinskeje kupki zmakali, aby wili wěnk a girlandu za ten bom. Z wěcej ako 25 mejtarjami su źowća trjebali ten cas, wetom, ako su gólcy wobstarali jegliny škrjokow a „to zelene“ za tu girlandu. „Dopołdnja smy pśecej sejźeli pór štundow dłujko pśed młoźinskim klubom, aby to zwónoźeli“, wulicujo Juliane Tkalcykojc (Kalzke). Wóna a Sophie Rademacherojc wugbatej wót lěta 2019 amt šefowki tudejšeje młoźiny.